søndag 17. mars 2024

God varme...


I Gjerda i Stongfjorden

Nok ein flott dag med ved-arbeid inne hjå Håvard og Miriam i Gjerda. Veden varmar som vi veit fleire gonger. Iallefall når den skal sagast på rot, fraktast til gards, delast og kløyvast - ja, og så leggast opp i lad for tørking. Reint fysisk er det såleis god trim. Og veldig givande i fint vårvèr (ein ser med det blotte auge kva som blir gjort - det er ikkje alt arbeid som rett og slett viser igjen)! 

Godt kva som er gjort med varmen til neste vinter. Greitt nok, vi har ei toårig varmepumpe, men ingenting slår god ved og varme i omnen.  

onsdag 13. mars 2024

Tele 2, mobilen min og mi kjære mor



Eg ruskevèret i dag fann eg att ei artig historie eg skreiv i 2007. Eg publiserer den opp igjen for nye lesarar 😄. Truleg tek mor mi historia med like godt humør i dag som den gong i 2007.  Skaartun har jo hatt si soge om breiband i det siste, så den serien føl jo godt i mine fotspor!  Innlegget går som følgjer - og hald følgje i svingane - den har sine sidesprang... 😁

Eg har funne ut at mobilen min lever sitt eige liv. Så etter å ha vore den heldige eigar av 971 69 357 i ”ein halv mannsalder” treivst den visst ikkje lenger med meg ”ude på den nøgne ø”. Den meinte visst det var grønare på hi sida av gjerdet. Eg gjer difor orda til Jakob Sande, min tidlegare sambygding, til mine, når eg kviskrar: ”Eg tenkjer på deg, ved dag og ved natt, og min draum er den, å få sjå deg att”

Frå Du, "Det kveldar på Kobbeskjer"

No var det vel ikkje mobilen Jakoben tenkte på då, men ei fager gift dame austafor. Som reinkarnert vil eg òg tenkje på fagre damer, gifte eller ei, og skrive bøker om alt frå mobiltelefonar til mitt hjartebarn - rennande, fossande og jomfrueleg vatn, krangle med alskens folk om kraftlinjer og kraftutbyggjingar og banne så mykje eg vil….) !

I forrige månad stusse eg over e-fakturaen eg fekk frå mobilselskapet mitt Tele 2. Eg har vore kunde her i mange år. No fekk eg berre rekning på breibandet, men ikkje på mobilen. Hadde eg snakka så lite i sommar? Var rekninga under 300 kr og overført til neste månad? Eller var Champion-abonnementet mitt blitt billegare i mobilkrigen? Mobilen hadde jo gløda med bilder og tekst om kraftlinjetrasèar, fotturar, dårlege kne, elendig fiske og kjekke kvinnfolk! Eg tenkte likevel ikkje så veldig mykje meir på det akkurat då.

Stor var difor mi undring då e-fakturaen i august òg dukka opp i nettbanken berre med krav på breibandet. Dette måtte eg ha greie på! Så eg tok å ringde inn på kundesenteret på Tele 2 og høyrde korleis dette hang i hop.

Eg fekk hakeslepp. Nummeret var ikkje lenger mitt! Spirrevippen hadde slept det fri, det hadde rømt, flytta, emigrert eller reist på ferie? Det hadde teke ein Global Travel gjennom universet utan sidestykke og vore på reise sidan 23.mai!
 

Eg sjekka på telefonkatalogen.no og riktig - mitt kjære 971 69357 gjennom mange år var ikkje lenger mitt! Det var reinkarnert og var dukka opp igjen frå sin sfæriske tur gjennom universet og glødande tastetrykk, diverse servarar og tomme pc-blikk og komme heim til mor mi i Dale.
Ikkje for det. Der er eg sikker på at den ville få ei framifrå framtid! I eit stort kvitt hus, som vittige tunger hevdar må seljast på rot fordi det er umogeleg å tømme, ville den få eit nytt rikt liv. Der i mange uutforska rom, i skuffer og skap ville den finne mange av same slaget som kunne berike kvardagen og føre til endå fleire, blomstrande nye nummer....Ein aura av fornying. Friske nye nummer som hadde visjonar for framtida. Som kunne utveksle meiningar om det meste og late nabonummeret vere i fred når det trengde det.

Så eg ringde mi kjære 70 årige mor og lurte på kva slags frieri ho hadde fått ja på på sine eldre dagar. Jau, ho hadde sendt inn eit skjema som ein luring av ein rundbrennar hadde sendt frå Tele2. Mi pratsame, kristeleg og nøysame mor med synspunkt på det meste, ville sjølvsagt prate så fritt og så lenge ho ville med alle sine utan at griske mobilselskap skulle rane ho endå meir frå pensjonen sin! Mor mi som i alle dagar har sytt for seg og sine! Når eg likevel lurte på om ho ikkje hadde merka noko på rekninga si, får eg som svar at det «kjem no så mange telefonrekningar". (Faderen tastar jo i veg han òg både på PC og mobil. Rett nok med litt feilsendingar av SMS og diverse problem med MMS,en....:-))

Dette var heilt tragikomisk. Eg måtte nesten le. Den kjære mor mi hadde fått overført nummeret mitt til seg, betalt rekninga mi i to månader. Det griske, ukristelege selskapet hadde heller ikkje noko omsut for meg, så eg visste ikkje eit kvekk!

Korleis i himmelens navn kunne dette gå an? Eg ringde Tele2 igjen. Veit du kva han svarte spirrevippen? Eg måtte få mor mi til å fylle ut eit eigarbytteskjema på nummeret MITT, signere og sende det tilbake til uvesenet. Dette skulle dei ha 199 kr for!!

DÅ vart eg forbanna! Dei hadde stole mobilen min – og no måtte eg attpåtil betale for å få den igjen!

Vidare detaljar kjem i neste kapittel, men so mykje kan eg røpe at ekteskapet mitt med dette selskapet heng i ein tynn tråd.
Eg er ein lojal fyr, men det får no vere visse grenser...

Når eg i tillegg dagen etter høyrer i nyheitene at dei er hacka for alle personnummera i kunderegisteret sitt, så har eg ikkje berre misst mobilen min i sommar, men og fødselsnummeret mitt! Eit identitetstjuveri av dimmensjonar er på gang! Kven er eg?

I etterkant av sjokket har eg fått pusten igjen frå min noko svekka kondisjon. Men no stussar eg over diverse telefonar eg har hatt i sommar.

For spesielt Sjømannskirka har vore usedvanleg travel på tråden for å selje lodd. Skuldast det at mobilen min no står på den 70-årige lettlurde mor mi? Og veit du kva dei spør om når dei ringjer? Vil du støtte Sjømannskirka? Når eg så svarar Nei, får eg spørsmålet tilbake – støttar du ikkje Sjømannskirka? Så her skal eg sitte med dårleg samvit og. Er eg schizofren blitt?

Nei, seljarar av mobilabonnement og lodd har eg fått opp i vrangstrupen. Hadde eg vore på eit folkemøte om desse uvesena òg, som stel og lyg, ville eg ha banna igjen...Ikkje berre ein gong – men, fleire!

Dei får ikkje sei ædda bædda til meg!


Og her er oppfølgjaren:


Historia om mobilen har tatt ei ny vending...Eg har fått att nummeret mitt. Som du sikkert hugsar hadde mor mi meldt nummeret mitt inn i Tele2 si familieløysing for familiær gratisprat utan å ha underretta meg, og Tele2 overførte nummeret mitt til henne, utan å seie eit pip til meg. Absurdement..Men som om ikkje dette var bort i hamp og staur og veggje, meinte selskapet at eg skulle betale 199,- kr for å få ATT nummeret MITT. Vel, DET laut dei gje seg på, og krype til korset. Det er no måte på kor toskne dei trur vi "bygdebønde" er....

Så sjølv om nummeret mitt framleis står på mor mi sitt namn på Opplysningen 1881 og telefonkatalogen.no sine lite oppdaterte registre, så er nummeret flytta heim igjen etter sin spaceflight!

Vel, no har det seg slik at påkjenninga for sjølva hard-waren på mobilen vart nesten uuthaldeleg når nummeret forsvann. Eg har difor hatt store problem med å få mat i karen i heile sommar. Med stadige oppkast og diarè var det kul flette å få i han fast føde, og det flytande var i så små porsjonar at han stadig gjekk seg tom i motabakkane. Når den i tillegg berre gjekk på halvparten av tangentane, og var vanskeleg å høyre i, dårleg å sjå på, og var skjelven i fisken, var det berre ein ting å gjere - søke om førtidspensjonering for den gråsprengde stakkaren som hadde slite eit heilt liv. For dette var berre ikkje til å leve med.
Så den utbrende og tilårskomne mobilen fekk sin rettferdige plass for å nyte alderdommen i eit nyinnreia rom i skjenken i stova.

No har det seg vel slik at den som framleis er litt frisk og rask, og nokolunde føl med tidens krav, lyt sjå innom til slike gamle stakkarar som har gjort si tèn. Det må vere utgangspunktet både for deg og meg. Men eg hadde aldri tenkt meg at sorga over å måtte flytte inn på sitt eige flotte og nyinnreia rom allereie første natta skulle få slike dramatiske konsekvensar at eg i hui og hast måtte rykkje ut for å stanse sytinga til den gamle stakkaren. No har det seg sjølvsagt også slik at eg har eit så lett sovehjarte at eg ofte vaknar av den minste ting. Dette er ein situasjon som har utvikla seg til ei aldri så lita plage dei seinare åra. Men trøysta får vere at når eg hugsar tilbake på Morgan Kane bøkene eg las som ungdom, så sov han aldri meir enn med eitt auge att, og i tilegg sat han alltid med ryggen mot veggen for å vere på vakt mot potensielle farar. Så såleis er eg i godt selskap.

Til å begynne med kunne eg ikkje fatte kva lyder som nådde hamrane i øyra mine seinnattes i mørkna denne natta. Først trudde eg det var avundsjuke kattar utanfor soveromsvindauget, så tenkte eg på nyfødde ungar - men det er det lite av her på Yndestad, så stussa eg på om cd-spelaren sto på på guterommet, men den hadde eg no slege av i går kveld? - kunne det vere brannvarslaren på gjesterommet?, nei, dette var eit mysterium som eg måtte finne ut av. Så eg kraup ut av den varme bikka og gjekk på oppdagingsferd rundt om i huset frå rom til rom for å avsløre mysteriet.

Ja, cd-spelaren var slegen av, ingen brannvarslar peip på gjesterommet, og ute på altanen kunne eg berre konstatere at ingen av dei 4 nabokattane til Hans;en og den eine til Kjellen i huset innafor, var å sjå eller å høyre. Nei, dette var og blei eit mysterium. Men lydane måtte eg berre finne ut av. Kunne dei kome frå kjellaren? Var her lekkasjar frå varmtvasstanken eller heldt frysaren (som har sett sine beste dagar) på med sine siste andedrag? Så, eg tok meg ein tur ned i kjellaren iført berre trusa og barfot til beins på det kalde betonggolvet for å søkje løysing på mysteriet. Men trur du øyra mine fanga opp noko nærare signal her nede?

Opp igjen i huset, ut i gangfanget, ingenting, inn på kjøkkenet igjen, ingen ting...kunne det komme frå stova? Eg gjekk hovudstups inn i stova etter å ha smelt likkjetåa godt ned i dørgotta så eg skreik høgt! Svarte f... for eit mareritt. Hadde nokon vore vitne til denne seansen hadde dei trudd eg var totalt maniac og ute av stand til å ta vare på meg sjølv...! Men eg kom meg no sakte til hektene igjen etter at eg fekk teke meg ein slurk Pepsi-max frå kjøleskapet....Og så peip det igjen..

Som du sikkert allereie har forstått no var eg begynt å vakne og greidde å lokalisere læta sånn nokolunde. Ja, og så var eg sjølvsagt begynt å bli relativt forarga på heile greia. Ikkje nok med at søvnen var røva i frå meg, men likkjetåa verka noko så bort i staur og veggje at eg trudde ho minst var brota. Så etter først å ha sjekka tuneren på parabolen og den bærbare pc,en, gjekk brått lyset opp for meg. For i svarte svingande det var jo den kjære, gråsprengde og tilårskomne mobilen min som ga i frå seg sine siste pip! Sine siste lydar som eg var så vel kjend med og som eg brått ikkje hadde kjent att! Gjekk det an? Kva vilske var eg vakna opp i? Kjende eg ikkje igjen min gamle ven? For sjølvsagt ville den at eg skulle stå opp og sjå til han. Det var jo eg som hadde bett han om å gjere nettopp det! Stakkars du gamle ven som har tent meg slik i tjukt og tynt - det var jo klart at du ville ha litt ekstra forpleining no første dagen i den nye flotte, men sterile heimen din! At eg kunne vere så dum å ikkje tenkje nettopp på deg når nokon peip så ynkeleg. Du med ei sjel så stor som alt rennande vatn og fjell! Min gamle kamerat som eg har slite på utan annan omtanke enn å tilfredstille meg sjølv og eigne lyster...

Eg vart brått flau kan du tenkje deg..Så eg tok min gamle våpendragar varsamt opp av den nye heimen i skuffa i skjenken, og sette meg pent ned i skinnstolen min, og strauk han ømt over tangentane. Ynkinga forsvann som dogg for morgonsol. Eg sat der og tenkte, med mitt gamle hjartebarn i nevane og strauk og strauk...til han stille sovna...

At eg kunne vere så dum! Klart den gamle mobilen min ville pipe så ynkeleg første natta i sin nye heim når vi ikkje hadde fått teke skikkeleg farvel kvelden før!
 

Dette har eg no teke som eit godt teikn på at du skal ta skikkeleg farvel med gamle vener når du skiljast! Det er heller ikkje så dumt å stikke innom av og til òg, for å sjå korleis det står til.

For no har min gamle heidersvenn atter funne roen i sin nye, velinnreia heim. Han ser meir optimistisk på livet når han no veit at eg atter kjem på besøk...No slepp han å skrike stygt om nettene for å få den rettmessige omsorg og pleie han har bruk for. Ja, for no veit han at eg snart kjem på ei ny vitjing...! Kanskje i kveld?

I dag har eg skaffa meg ein ny mobilvenn. Det er ei dame - ei Sony dame, med tittelen K810i. Ho er ny og frisk i måten å tenkje på, har andre draumar og vyer for livet og ikkje minst fleire strenger å spele på, enn min gamle heidersven. Ho er spanande å sjå til, har lekre nye antenner, nytt blått lys i auga som glitrar når eg trykker på, og sender meg nye beskjedar som eg ikkje alltid heilt forstår. Men du verden når eg forstår ho, himmel på jord, du salige velgjerar som kan gje meg så mykje informasjon, flotte bilder å sjå og tenkje på. Eg blir reint yr og barnsleg i samkvemet med ho då...! Kan berre ikkje late ho få fred, tenkjer og jobbar og tenkjer på min nye venn...Ja, reint forførerisk er ho i måten å vere på då! Så brått prøver eg på noko nytt og pressar litt for mykje på - og så forstår vi ikkje kvarandre igjen... Nye trykk og meir forvirring...og så får eg atter nye beskjedar som òg er forvirrande. Eg prøver meg med gamal erfaring og nye instruksjonar att. Det hjelper, og eg er igjen i himmelen, og blir blenda av kva vi finn ut ilag.... Men når ho igjen seier stopp og eg ikkje har fleire knappar å trykkje på, blir eg nesten fortvila og lei meg. Verst er det å bli liggjande om natta å fundere på problemstillingane som eg ikkje finn ut av...Då kjem spørsmåla som perler på ei snor...Kva skal eg gjere? Skal eg prøve å sove på det? Ser eg lysare på problemstillingane i morgon? Eller skal eg berre ta tia til hjelp og sjå om alle problema som tårnar seg opp løyser seg sjølv?

Vel, sant å seie - eg veit ikkje. Vi får prøve å ta eit av problema om gongen (eller det heiter vel ikkje det, heller utfordringar...:-) og ikkje late alt bli eit mørkt, nakje og uoverstigeleg fjell....For er det noko eg veit, så er det at skal ein bestige store fjell, så er det viktig å ta eitt steg om gongen! Og det er ikkje særleg lurt å ta det neste steget altfor fort heller. For store fjell har eg komme over før, så her veit eg kva eg snakkar om!

Men ein ting er sikkert: min gamle ven, som ligg på Lit de parade i skuffa i skjenken, var til tider lettare å forstå....men, så har vi jo hatt mange år ilag og då....

søndag 10. mars 2024

Sosial rusletur

Ein liten lun plass

ds 
(med mobilen i 45 grader på sjølvutløysar)

I dag tidleg fekk eg telefon frå broderen. Han og Tone ville ha seg ein snøfri tur. Så då var det naturleg at dei kom hit. Til solsida. Og eit snøfritt område frå Toreheia til Stavensodden. Inkludert Skylefjellet og Høgeheia. Vi gjekk såleis opp her heim til Skylefjellet. 

Veret var strålande. Og ruta heilt tørr og fin. Så tørr som det nesten let seg gjere. Fantastisk! Rett nok var det ein litt trekk i lufta då vi kom opp over Rinda. Som tenkt. Den solrike sørsida er alltid mindre trekkfull enn oppe på fjellet. Så langt ute mot havet. 

Elles hadde vi matykt på toppen. Kaffi og skiver. I grasbakken nedom varden. Og praten gjekk livleg. Latteren sat laust. Både opp og ned. Kjekk tur. 

Etter vedhogsten med Sillan og Håvard i Gjerdedalen i går, vart dette såleis andre dagen på rad broderen var i Stongfjorden. Vakker og vårleg som bygda er på denne tid 😊

Foto Skylefjellet 100324

onsdag 6. mars 2024

Nydeleg vårtur (2)

Dagens self....😎

Sol over Granesundet

I dag gjekk vårturen til HøgeheiaStavenesodden. Deretter heilt vest til Furefjellet. Det ligg rett ovanfor sjølve Staveneset. Med perfekt utsikt til Atløy, Heggøyna, Alden og Smelvær. Og øyane i Florø i nord. 

Heilt vindstille i dag. Eit par, tre plussgrader på morgonen. Og på Stavenesodden er det no heilt snøøfritt, gtørt og fint i terrenget. Ja, du kan gå med låge sko! Herlig vårkjensle!

Video Furefjellet 060324

Foto Høgeheia Furefjellet 060324


tirsdag 5. mars 2024

Nydeleg vårtur

Utsikt heim igjen frå Yndestadhøgeheia


Motiv ved Krikavatnet

Utsikt mot Krikavatna, Mangevatna, Skylefjellet og øyane i Florø

Stongfjorden

Utsikt mot sør
vi ser m.a. Skålefjelellet, Svarthamrane og Moldura

Utsikt frå Toreheia -  
vi ser Alden ytst ute i vest
fjella ved Askvoll t.v. og Staveneset i midten- framme i midten toppane på Yndestadhøgeheia

Så var eg endeleg tilbake på Toreheia. Etter ein lengre periode med trening i trimrom, heime og 3 veker på Haugland, var det herleg å få kjenne på den friske vårlufta i bakkane på ruta frå dørstokken heime. Tørt og fint heile vegen. Til Rinda, Krikavatnet og opp dalen til topps. Returen gjekk via Yndestadhøgeheia, Selda og heim til Yndestad. Oppe i dalen låg det litt isete snøflekker mot nord, men elles var det bort i mot snøfritt heile vegen. 

På veg over Yndestadhøgeheia traff eg ein kar eg kjende frå Askvoll. Vi vart preikande eit bèl. Kjekt. Elles såg eg ein person med hund på ruta til Krikavatnet då eg kom ned att heia lenger i sør. 

Fantasktisk flott og solrik dag. God temperatur (11,5 grader her no), men frose på i høgda. 

Bilder Toreheia 050324


mandag 4. mars 2024

fredag 1. mars 2024

Dagens trim

 

Hin dagen - Trilletur frå Søråshøgda til Lagunen

Då er vi tilbake i Stongfjorden etter ei veke med barnepass i Bergen. Di fleire hender i arbeid di betre 😀Olaug har jo fått tre nye barnebarn. Dei er berre nokre månader gamle. Så det har blitt mange trilleturar, rusling innadørs, p(r)omp og prakt... 😁 Og no er dei her og!

I tillegg til ungar vart det òg to besøk til tannlegen- A to timar. Heilt usliten! For å få på plass ei rotfylling. Rota skulle vise seg så spesiell at eg lyt til pers ein gong til - håpar eg når toppen då - eller rettare sagt botnen😕

Elles veldig kjekt å vere tilbake i bygda å få nytte seg av trimstudioet til Jeff Pedersen i gamle fabrikken. Rommet er veldig bra utstyrt! Har brukt det ganske mykje i det siste. Også i dag. Har fått god sans for romaskin, trimsykkel, vekter, bøy og tøy. Noko eg sette veldig stor pris på Hauglandsenteret òg. Så shit i dårleg vèr og fjell når ein har eit så bra trimtilbod i bygda. Fjella ligg no der. Dei er ikkje noko must lenger.... Dei bestig vi når det høver seg slik. 

God helg!

tirsdag 20. februar 2024

Stor takk til Hauglandsenteret

 





Eg vil få rette ei stor takk til Røde Kors Haugland Rehabilitetssenter for tre fantastiske veker. Eg var så heldig å få oppleve meiningsfylte dagar her. Prega av dyktige fagfolk og instruktørar, trening, lærerike føredrag og god mat. På heimesida kan du lese om kva ein tilbyr i eit rehabiliteringsopphald på Haugland. 

Elles vart vi ein veldig flott og samansveisa gjeng i mi gruppe. Gode vener gjennom sosiale dagar. Alle med kvar vår livshistorie. Til slutt vart det ei særs vemodig avskilsstund. Kanskje kan vi treffast igjen ein gong? Somme av oss? Det er jo òg mogeleg å vere så heldig å få tildelt eit opphald på Hauglandsenteret ved eit anna høve.  

Tusen takk!

søndag 28. januar 2024

Litt på forskot

 

Litt på forskot kjem her bilete frå februar. 

onsdag 17. januar 2024

Solsidevegen

 


Som så mange gonger før i vinter tok eg meg ein tur inn Solsidevegen til demma og heim igjen i dag. Ca 1 time og eit kvarter. Passeleg pensjonisttur. I dag med 7-8 minusgrader. Og 10-15 cm nysnø. Nydeleg vinterdag. Sjølv om denne ruta ber sitt namn med rette - så er ikkje sola komen igjen her inne endå. Men snart klatrar ho over Størdalsstauren og er tilbake. Det lysnar heldigvis for kvar dag no....